اليوم عندنا تقييم لسلسلة من سلاسلي المفضلة بالعالم ..
بدون لا أطولها عليكم أعزائي القراء، اليوم راح أقيم لكم سلسلة The Lunar Chronicles تأليف الرائعة Marissa Meyer
أولًا خلونا نبدي في عالم السلسلة عشان نعرف وين راح نكون هالمرة:
أحداث السلسلة تصير في عالم مستقبلي، البشرية لقت طريقة إنهم يسكنون في القمر، و الناس اللي قرروا إنهم يستقرون في القمر اسمهم Lunars و يتميزون هذيل الناس إن عندهم طاقات معينة بحكم إنهم عاشوا في القمر فترة طويلة و لازم يتأقلمون مع بيئتهم اليديدة، أما الناس اللي ظلوا في الأرض إهما البشر العاديين .. فإحنا في كل جزء راح نكتشف جزء يديد من هذا العالم و شنو مصير العلاقة ما بين أهل الأرض و أهل القمر ؟
فكرة السلسلة:
السلسلة عبارة عن أربع أجزاء أساسية في بينهم أجزاء تعتبر فرعية من السلسلة، الأجزاء الأساسية إهي ( Cinder, Scarlet, Cress, Winter) كل جزء من هالأجزاء إهو إعادة صياغة لقصة كلاسيكية إحنا نعرفها لكن بحبكة خيال علمي
الجزء الأول من السلسلة تم ترجمته للغة العربية و هو متوفر في بابونج ستور على هذا الرابط :
خل نيي ألحين على تقييم أجزاء السلسلة :
الجزء الأول من السلسلة إهو Cinder :
مثل ما إهو واضح من عنوان الكتاب، إهو عبارة عن إعادة صياغة لقصة سندريلا ..
القصة تبدي في الصين المستقبلية، و حاليًا في فيروس منتشر و قاعد يذبح وايد ناس، و راح نلتقي ببطلتنا الأولى في السلسلة اسمها سندر، إهي وحدة عمرها 16 سنة تعيش مع زوجة أبوها و بناتها و إهما يعاملونها معاملة سيئة جدًا بسبب إنها نصف آلية، يعني فيه أجزاء منها آلية و هذا الشيء يخليها أقل من انسان، لكن سندر ما يأست و طورت نفسها و صارت أحسن ميكانيكية في المدينة و سمعتها وصلت لي المناطق الثانية، لين في يوم من الأيام تتغير حياة سندر لما إييها أمير الدولة كاي و يطلب منها إنها تصلح آلية عنده لأن في برنامجها معلومات مهمة يحتاجها، و هذا الحدث راح يغير حياتها للأبد
رايي بالكتاب: أنا من الناس اللي قرأت الكتاب أول ما نزل، و كنت عبالي إنه جزء واحد، و هذا أول كتاب للكاتبة، حبيت أسلوب كتابتها و تسلسل الأحداث، أدري هالشي بيكون صدمة حق وايد ناس لكن بالنسبة لي الكتاب كان عادي جدًا .. ما كان حلو و لا كان بايخ، لدرجة يوم خلصته و سمعت إنه فيه أجزاء ثانية ما تحمست لهم .. حسيت إن ماكو سالفة .. و بالنهاية عطيت الكتاب الأول 3 نجوم من 5
نيي ألحين على الجزء الثاني من السلسلة اللي إهو Scarlet
هذا الجزء إهو عبارة عن إعادة صياغة لقصة ليلى و الذيب، و الشخصيات الجديدة اللي راح نتعرف عليهم إهما سكارليت و وولف، سكارليت بنت تعيش مع جدتها في فرنسا الموجودة في عالم السلسلة المستقبلي، و في يوم من الأيام كانت رايحة تسوي شغلة و لما رجعت البيت تكتشف إن جدتها اختفت و ما تدري وين راحت، و عشان تلقاها ينضم لها وولف اللي إهو كان جندي سابق من جيش أهل القمر Lunars ، هل راح تلقى سكارليت جدتها ؟ و شنو علاقة قصتها بقصة سندر من الجزء الأول ؟
رايي بالكتاب: لا تحاتون القصتين راح يرتبطون ببعض بطريقة وااايد حلوة، بالنسبة لي هذا الجزء إهو أحلى جزء بالسلسلة مع إن وايد ناس ما يحبونه مادري ليش أنا أحبه حيل و سكارليت وولف من الشخصيات اللي تعلقت فيهم وايد بالسلسلة، جدا جدا جدا ممتع و المغامرة فيه مووو طبيعية، و بهالجزء يطلع شخصيتي المفضلة بالسلسلة كلها اللي إهو كابتن ثورن ( اللي راح نتكلم عنه زيادة في الجزء الياي)، فالكتاب كان ممتااازز، يمكن لو كنت راح أعدل فيه شغلة إهي شخصية كاي ما عجبتني مقاطعه، لكن هالشي ما أثر على تقييمي و بالنهاية عطيت هذا الكتاب أكيييد 5 نجوم من 5
تمام ألحين ننتقل لي الجزء الثالث من السلسلة اللي إهو Cress
هذا الجزء إهو عبارة عن إعادة صياغة لقصة ريبانزل ( فلم Tangeled إذا تعرفونه )، و راح تطلع لنا شخصية جديدة طلعت بمشهد واحد في الجزء الأول اللي إهي شخصية كريس، كريس بنت عمرها 18 سنة تعيش في سفينة فضائية بين القمر و الأرض طول حياتها إهي وحيدة من جذي تعلمت شلون تشتغل على الكومبيوتر و صارت هاكر قوية حيل، فبعد الأحداث اللي صار في الجزء الثاني (خاصة النهاية ) بضطرون سندر و كابتن ثورن إنهم يستعينون بمساعدة كريس عشان تساعدهم في المهمة اللي يبون يسوونها، لكن الأمور تأخذ منحنى ثاني و ينفصل ثورن عن سندر و يصير مع كريس فريق واحد عشان يرجعون لها .. شنو اللي راح يصير عليهم ؟ و هل راح يقدرون يساعدون سندر بعد اللي صار ؟
رايي بالكتاب: هذا الكتاب إهو الكتاب المتفق عليه من كللل اللي قروا السلسلة إنه أفضل كتاب .. هل كان كان الكتاب حلو ؟ إيييي جدا جدا حلو و مغامرته طاحنة و حلوة، هل كان أحلى كتاب بالسلسلة ؟ بالنسبة لي رغم إن الكتاب مركز على قصة الكاتبن ثورن و كريس ( و هذيل شخصياتي المفضلة) إلا إني حبيت الجزء الثاني Scarlet أكثر مادري ليش .. الرومانس كان عجيب و طريقة ربط الكاتبة بالأحداث مع بعض رااائعة و صج أثبتت جدارتها و شكثر إهي فاهمة العالم و الشخصيات، فباختصار الكتاب هو تكملة ممتااازة للسلسلة و أحداثه قوية حيل لكن شخصيا أنا أحب الجزء الثاني أكثر و بالنهاية عطيت الكتاب 4.75 نجوم من 5
أوككي ألحين نيي على الجزء الرابع و الأخير من السلسلة اللي إهو Winter
هذا الجزء إهو عبارة عن إعادة صياغة لقصة سنووايت و الأقزام السبعة و راح تطلع لنا شخصيات جديدة اللي إهما وينتر و جاسون، وينتر إهي بنت زوج ملكة القمر ليفانا ( تتذكرونها ؟ إهي موجودة بكل الأجزاء بس أنا ما أقدر أقول شي من غير حرق أحداث بس إهي الشريرة بالسلسلة كلها ) المهم الأميرة وينتر حاسة إن ليفانا ظالمة و إن الناس مو مرتاحين منها بس مو عارفين شنو يسوون معاها، من جذي تحاول وينتر إنها تتواصل مع الأرض و تشوف شنو تقدر تسوي .. و هني تلتقي بمجموعتنا سندر و أصدقاءنا اللي تعرفنا عليهم في الأجزاء السابقة، و هني راح تنتهي المغامرة لما يصيرون كل أبطالنا فريق واحد ضد ليفانا ملكة القمر، شنو اللي راح يصير ؟
رايي بالكتاب: واايد ناس ما يحبون هذا الجزء و يحسونه طويل حيل على الفاضي، شخصيًا أنا ما حسيت بهالشي لأن الأحداث كانت تمشي بطريقة سلسلة جدًا اللي ما حسيت فيها، و خاصة شلون الكاتبة ربطت قصة سنووايت بهالقصة جدددا روعة، يمكن إهو مو أحلى كتاب بالسلسلة لكنه أكيد من الكتب اللي حبيتها و ليلحين أتذكر أحداث منه و بالنهاية عطيت الكتاب 4.5 نجوم من 5
ألحين إحنا خلصنا الأجزاء الأساسية من السلسلة و باقي الأجزاء الفرعية اللي إهي Stars Above و Fairest
أول شي خل نتكلم عن Fairest، هذا الكتاب المفروض تقرؤونه بعد Cress لأنه إهو عبارة عن مقدمة حق كتاب Winter و يتكلم الكتاب عن قصة ليفانا (شريرة السلسلة ) و شنو اللي صار معاها عشان تكون إهي بهالشر .. الكتاب جدا جدا مؤثر، مو ضروري تقرؤونه عشان تفهمون الأحداث لكن حلو إنكم تقرونه إذا تبون أكثر من هالعالم و عطيته بالنهاية 4 نجوم من 5
و الكتاب الثاني اللي إهو Stars Above اللي المفروض تقرؤونه بعد نهاية السلسلة لأن فيه حرق لأحداث السلسلة، هذا الكتاب هو عبارة عن قصص قصيرة تصير أحداثها داخل عالم سلسلة Lunar Chronicles فيه بعض القصص متصلة بشخصيات السلسلة و بعضها مالها شغل بأحداث السلسلة لكن في نفس العالم .. وايد حلو إذا انتوا حبيتوا السلسلة و تبون تكونون بهالعالم زيادة، و فيه قصة منهم أحداثها تصير بعد أحداث السلسلة و فيه ثنائي من الشخصيات راح يتزوجون !! بس ما راح أقولكم منو اقروا الكتاب و راح تعرفون 🙂
الكتاب جدًا لطيف و خفيف و عطيته 4 نجوم من 5
و بجذي خلصنا تقييم سلسلة Lunar Chronicles اللي إهي من سلاسلي المفضلة ..
إذا حابين تشوفون تقييمي للسلسلة بالصوت و الصورة أنا مقيمة السلسلة على قناتي اليوتيوب (م.بابونج) و هذا رابط الحلقة
ان شاء الله قريبًا راح تتوفر السلسلة في المتجر لكن حاليًا متوفر عندنا الجزء الأول المترجم بالعربي إذا حابين تقرونه في هذا الرابط
-
سندر
8.50 د.ك